ఆడవారి మాటలకు అర్ధాలు వేరులే...

కవిత రచన : సాత్విక

మంచు పల్లకి కావాలని 'నేను కోరుకుంటున్నా' 

కరిగి కనుమరుగవుతుంది అని నీవంటున్నా

మనస్సెరిగి మనం వాదులాడుకుంటున్నా!

'మన అనురాగమే మంచైతే' , కరగదంటున్నా!!

స్వయంవరమునకు నేను వువ్విళ్ళురుతున్నా

మనోభారమేల అని నీవు కాలయాపన చేస్తున్నా

మనస్సు దోచి, 'నీవు రేపిన ఆశలే'  మిన్నకుండునా !

ఆ ఆశలే హరివిల్లుగ చేసి నీవే -- ' నా రాముడివంటున్నా '!!

మత్స్య యంత్రము నీ ముందు పెట్టి నే సరదా పడుతున్నా

ఇది ఏమి కుతంత్రము? అని నువ్వు దిగాలుగా కూర్చొన్నా

'పారదర్సకత లోపించని మనస్సు'లు మనవే కదా అంటున్నా!

ఆ మనస్సునే దర్పణముగా మత్స్యము నే చూపకుందునా ??

అనుక్షణం ' నీ సాంగత్యమునకై ' నా మనస్సు తపిస్తోందని నేనంటే

ఏకాంతం కూడా ఆస్వాదించుట నేర్చుకోమని నీవు నాతో అంటుంటే

రెండు ఒకటైన మనం విడివడితే ' ఏకాంతమే అగును ఒంటరితనం '!

ఏలా చెప్పను ? నీ సగం మనస్సుని -- ' నేను ఒంటరి చేయలేనని '!!