ఎవ్వరు ఏమనుకున్నా...

కవిత రచన : సాత్విక

ఎవ్వరు ఏమనుకున్నా ...

నేను నువ్వై జీవిస్తున్నా !

సరిగా తయారే కాలేకున్నా,

అద్దములోనా నిన్నే చూస్తున్నా,

అందరినీ చూసి నవ్వేస్తున్నా,

వారిలోనా నిన్నే గుర్తిస్తున్నా!

గమ్యానికి చేరుకోలేకున్నా,

రహదారి పొడవునా నిన్నే కన్నా,

నువ్వే నా ప్రకనున్నావనుకున్నా,

చిన్నపిల్లలా చిందులువేసేస్తున్నా!

వానచుక్కని వారించలేకున్నా,  

నువ్వేననుకొని పొరబడుతున్నా,

చందమామని చూడలేకున్నా,

నీలాగున్నాడని సిగ్గుతో తల తిప్పుకున్నా!

ఎందుకో ? 

నా గుండె సవ్వడి నేనే వినేస్తున్నా,

అది నీ పేరే జపిస్తుంటే మురిసిపోతున్నా, 

నా మనస్సు నాతోనే మారాం చేస్తున్నా,

అంతలోనే అది నీదని గుర్తొచ్చి మెదలకున్నా! 

ఎవ్వరు ఏమనుకున్నా,

నేను నువ్వై జీవిస్తున్నా!