ఇంతేలే నీ యవ్వారం...

కవిత రచన : సాత్విక

లేతప్రాయంలొ నీ కోసం నే పరితపించిన వైనాలు,

అమితమైనవి నాకు ఈ ప్రాయమునా అవే పోకడలు,

'ఋతువుల పొడవు'గ సాగేను నా ఈ ఎదురు చూపులు,

తామరాకు పై నీటిచుక్క చందమాయే నీ పలకరింపులు,

నీ దరిచేరు క్షణం కలిగించును అందమైన అనుభూతి,

ఆసాంతము ఆస్వాదించాలన్నది ఎప్పటికీ తీరని నా అత్తి,

ఎన్నిమార్లు చవి చూచినా తగ్గట్లేదు కదా నీ పై నా ఆసక్తి,

ఇప్పటిదా? అప్పటిదా? మరెప్పటిదోలే మన ఈ అనురక్తి, 

ఆహ్వానించకనే వచ్చి, అలక తీర్చి సేద తీరమంటావు,

నా అనుమతి లేకున్నా నడిరేయి చల్లంగా జారుకుంటావు,

వేకువనే నీ చాటుతో ఒంటరియైన నన్ను అదను చూసి, 

నీ మొదటి తోటికోడలు నిదురలేపును కదా మాటు వేసి,

ప్రతిసారీ నువ్వు వీడిపోయే ఆ ఉత్కంఠ క్షణాలు,

వెల్లువై పారెను మదిలో నీవు మిగల్చిన జ్ఞాపకాలు,

వీడకుండెను తనువంతా నిండిన బద్దకపు సరాగాలు,

మళ్లీ మొదలు నీకై 'ఋతువుల పొడవు'గా నా ఎదురుచూపులు,

ఆది నుంచి ఇంతేలే నీ యవ్వారం, అందుకే ఐనావు -- "ఆదివారం" !!

ఋతువుల పొడవు = ఆరు (అనగా ఆరు రోజులు అని చెప్పాలని నా బాధ ...)