ష్..ష్... బ్రేక్ ది సైలెన్స్

కవిత రచన : సాత్విక

ఎడబాటే అలవాటైనా
ఎదసవ్వడి భారమైనా

అందుబాటులో నీవున్నా
నేనే పలకరించలేకున్నా

పలకరింపే ప్రశ్నిస్తున్నా
పలుకే తట పటాయిస్తున్నా

నువ్వే నాకు ఎదురుగా లేకున్నా
నా ఎదురుచూపులు నీకోసమేనన్నా

మౌనంలో ఈకోణమే ఎంతో కొత్తగున్నా
నీ శబ్దం లేక నిశ్శబ్దం నాపై దాడిచేస్తున్నా

నా మది మౌనరాగం నీకు వినిపించకున్నా
నాపలుకే పెదవి పై నర్తించ తయారుగున్నా

నాదైన నీ మది నర్తనశాలలో నే నిలుచొని ఉన్నా
నీ అనురాగపు మువ్వల సవ్వడికై నే నిరీక్షిస్తున్నా...