వాస్తవ కల్పనా? కల్పిత వాస్తవమా?

కవిత రచన : సాత్విక

వాస్తవం అన్నదిలా...

ఓ కల్పితమా !!

నీ ఉనికికి రూపు లేదు,

నీ తాకిడికి బలం లేదు,

నీ తపనకి శక్తి లేదు,

నీ తలపునకి నాంది లేదు,

పోల్చుకొనుటే సాధ్యం కాదు,
నువ్వు నిజం కానే కాదు,

నేనే నిజం నిజం !! అని.

కల్పితం చెప్పిందిలా ...

ఓ వాస్తవమా !!

ఊహే నా శక్తి,

భ్రమే నా ఉనికి,

వర్ణనే నా ఆకారం,

భావుకతే నా ఆధారం,
నీది ఏక రూపం,
నావి భిన్న కోణాలు, 

అందరూ నీ అంగిట్లో అలసి,

నా ముంగిట్లో సేద తీరతారు …

ఈ నాటి మేధస్సు ఓ నాటి కల్పితమే కదా,

నీవు నాతో మాట్లాడుతున్నది నా సాయంతోనే మిత్రమా ...

నా అవసరం నీక్కూడా అవసరమే ఎంతైనా... హ హ హ !!!